Ergys Gjioveshaj, 33 vjeçari me banim në Vlorë është viktima e masakrës së ndodhur të enjten mbrëma në një lokal me muzikë live në zonën e Ujit të Ftohtë në Vlorë. Miku i tij, Alket Tahiraj i ka bërë një dedikim prekës në rrjetet sociale.
Ai shprehet i revoltuar nga komentet e njerëzve në lidhje me ngjarjen, shumë prej të cilëve fajësojnë të kaluarën e viktimës. Alket Tahiraj në fjalët e tij prekëse për vdekjen e shokut të tij, i kërkon t’i japë forcë motrave dhe prindërve për të përballuar humbjen e tij.
Policia arriti në kohë rekord të identifikojë autorët e dyshuar, ku njëri prej tyre 19 vjeçari Gani Tozaj ndodhet në qelitë e paraburgimit të Vlorës.
Dedikimi:
Vëllai im apo burazer se kështu i flisnim njeri tjetrit, më vjen keq që u ndave kaq i ri në këtë jetë. Rri e shof disa persona tani që komentojnë nëpër faqet e portaleve, komentojnë fjalë pa lidhje pa të njohur kush ishe. O burazer nuk e dinë që jepje zemrën e ndihmoje këdo. Nuk e dinë që ishe një djalë i mirë dhe i respektueshëm.
Ju lutem shumë o njerëz mos shkruani komente pa lidhje kur nuk e njihni një njeri që ka vuajtur gjithë jetën. Një djalë që e respektonte gjithë Vlora dhe jo vetëm. Ah o burazer nuk të deshi fati po jepu forcë motrave dhe prindërve të tu ta kalojnë këtë dhimbje, sidomos nënës tende që e ke të sëmur.
Vëllai im do më mungosh do më mungojnë shakat e tua dhe mendimet që më ke dhenë gjithmonë. Vëllai im i lutem zotit të të çojë në parajse se aty meriton të jesh. Lamtumir byrazer, ngushëllime familjes. Kushtuar Ergys Gjioveshit.
Ngjarja
Ngjarja ndodhi rreth orës 23:20, në lagjen “Ujë i Ftohtë”, në ambientet e lokalit ku dyshohet se pas një konflikti të çastit, është qëlluar me armë zjarri tip pistoletë dhe ka humbur jetën shtetasi Ergys Gjioveshaj, 33 vjeç, banues në Vlorë.
Krahas viktimës u plagosën tre persona të tjerë Florjan Hila, 28 vjeç i cili ndodhej një tavolinë pas viktimës, Arsonel Llanaj, 32 vjeç kamerier i lokalit dhe Arta Luka, 26 vjeçe e cila ndodhej bashkë me viktimën.
Të tre të plagosurit ndodhen jashtë rrezikut për jetën. Në momentin e ngjarjes lokali ka qenë i mbipopulluar çka ka shkaktuar panik. Viktima akuzohet për një vrasje të ndodhur në vitin 2001 në Vlorë, kur ishte vetëm 16 vjeç.
Për krimin për të cilin u akuzua, Gjioveshaj u dënua me 12 vite burg, por ai u arratis jashtë vendit, duke mos e vuajtur dënimin. I riu u arrestua në vitin 2011 në Vjenë të Austrisë dhe u ekstradua, por ajo që mbetet e paqart janë rrethanat e lirimit të tij./NOA
