30 gusht 2013: Kevin-Prince Boateng largohet nga Milan dhe shkon te Schalke. Në të njëjtën ditë, Klopp, i cili e kishte stërvitur te Borussia Dormund, zbuloi: “I nisa një mesazh ku i shkruaja: Schalke? Ai nuk mu përgjigj, sepse ndoshta i vinte zor.” Një provokim derbi mes miqsh, sepse Klopp dhe Boateng, sot te Frankfurt, kanë pasur një marrëdhënie speciale.
“Ai është trajneri më i mirë me të cilin kam punuar. Jo vetëm si trajner në aspektin e futbollit, por edhe si njeri, – deklaroi Boateng për “Bild”. – E di shumë mirë si duhen trajtuar futbollistët. Nuk është rastësi që skuadrat që ai drejton japin gjithmonë maksimumin në fushën e lojës.”
Tani që është 31-vjeç ai është shumë më i matur dhe luan gjithmonë me fanellën në nder të Abdelhak Nouri, 20-vjeçari i Ajax, që më 8 korrik, gjatë një ndeshje miqësore pësoi një hemorragji cerebrale nga e cila ende nuk e ka marrë veten dhe do të qëndrojë gjithë jetën i paralizuar…
“Pasi të mbyll karrierën si futbollist do të bëhem këngëtar, – ka zbuluar Boateng. – Me muzikë mund të përcjellësh mesazhe në të gjithë botën dhe unë uroj të arrij të ndryshojë diçka në këtë planet.”
