Rrëfimi i ish-të përndjekurit politik, Sokol Mirakaj, i cili ka provuar mbi supe peshën e rëndë të kampit të Tepelënës; ka përlotur drejtuesin e emisionit ‘Opinion’, Blendi Fevziun.
Tema e mbrëmjes ishte për fëmijët e masakruar gjatë diktaturës komuniste, ku dy personazhe: Sokol Miraka dhe Fatbardha Saraçi rrëfejnë çnjerëzoren e kampit famëkeq të Tepelenës.
Këto histori prekën dhe përlotën edhe gazetarin Blendi Fevziu.
Sokol Mirakaj tregon se në darkë, njerëzit në kamp, rreshtoheshin për të zënë radhën për te soba, për të pjekur lendet që të shuanin sadopak urinë e për të tharë rrobat nga shiu, që i kishte zënë në punë në mal.
Uria kishte pushtuar gjithë kampin, dy fëmijë që ishin më guximtarë, kaluan fshehurazi telat e filluan të hanë mollë, mbasi hëngrën mirë, u kthyen për t’u futur në kamp, ndërkohë i pa kapteri, i ndaloi të dy, i mori duke i rrahur me shpulla dhe i lidhi për një shtyllë, që ishte afër çezmës. Të dy fëmijët e lidhur për shtylle ishin Zef Mirakaj e Liman Koleci të moshës 9 vjeç.
Kur i zuri nata të lidhur, filluan të qanin nga frika, ndërsa nënat e tyre, motrat e të afërmit rrinin brenda telave të kampit duke u dhënë kurajë: “Mos kini frikë, se ja ku jemi!”.
Të dy fëmijët i liruan në mëngjes, të dyve ju kishte rënë të fikët kur i morën familjarët. Vdekjet e fëmijëve dhe pleqve vazhduan si shkak i mungesës së higjienës e ushqimit, çdo ditë dëgjoje nënat që vajtonin fëmijët.
