As në dhjetor nuk ka hapje negociatash për Shqipërinë sipas gazetares së njohur Erisa Zykaj. Në lidhje direkte me emisionin “Tempora”, Zykaj tha se ky është fakt i bërë i ditur nga disa prej shteteve anëtare të Unionit.
“Negociatat nuk do të çelen në dhjetor. Ky është një fakt dhe këtë e kanë bërë të ditur disa shtete anëtare të Bashkimit Europian. Nuk çelen sepse nuk janë plotësuar tre kushtet e para të kushëzimit të BE”, u shpreh gazetarja.
Sonila Meço e pyet gazetaren për kushtet të cilat janë të paplotësuara dhe i kërkon që ti përsërisë sërish.
‘Kanë të bëjnë me dy “D”-të e famshme. Demokracia dhe drejtësia. Dy kushtet e para janë, Reforma Zgjedhore, sipas rekomandimeve të OSBE/ODIHR dhe e dyta, funksionaliteti i plotë i Gjykatës Kushtetuese dhe Gjykatës së Lartë. Këto janë dy kushtet e para në 15 kushtet që shtetet anëtare të BE i kanë vënë Shqipërisë për të hapur ose çelur negociatat e anëtarësimit’ tha Zyka.
Gazetarja Zyka theksoi rëndësinë e Konferencës së Parë Ndërqeveritare, pasi sipas saj bëhet fjalë për themelimin e një shteti të ri.
‘Zyrtarisht, me mbajtjen e Konferencës së Parë ndërqeveritare, kemi të bëjmë me një situatë serioze pasi këtu bëhet fjalë për themelimin e një shteti të ri. Shtetet anëtare thonë, nuk keni demokraci, nuk keni drejtësi dhe nuk keni të drejta themelore’, përfundoi Zyka.
