Presidenti i Serbisë Tomislav Nikoliç ka deklaruar sot se Serbia është e gatshme ta dërgojë ushtrinë e saj në Kosovë, nëse popullata serbe në Kosovë rrezikohet.
Një deklaratë e tillë kërcënuese dhe provokuese në shekullin e 21-të kur dy vendet janë ulur në tavolinë për të gjetur gjuhën e bashkëpunimit me gjithë historinë tragjike të së kaluarës për një të ardhme evropiane nuk i shërben aspak asnjërës prej tyre por as vetë Evropës.
Për këto deklarata ka ardhur reagimi i parë nga politika shqiptare. Bëhet fjalë për ish-kryeministrin shqiptar në kohën e luftës në Kosovë Pandeli Majko, i cili ka edhe një lidhje të veçantë me Kosovën, ndërsa ka edhe pasaportë kosovare.
Ai thotë në një status në Facebook, se dialogu është opsion i zgjidhjeve europiane dhe ka raport me të vërtetën e paqes që duan kombet në rajon
Majko ka edhe një përgjigje për kërcënimin e Nikoliç, kur thotë se shqiptarët kanë një të metë kombëtare: “Ata janë më të aftë në luftë se sa në paqe”.
DEKLARATA E MAJKOS
Serbia nëpërmjet deklarimeve të presidentit të saj ka deklaruar se “do të dërgojë ushtrinë” në Kosovë.
Një deklarim i tillë ka kohë që nuk dëgjohet nga politika serbe. Kjo mënyrë sjellje pati pasojë gjakosjen e rajonit dhe dërgoi në Gjykatën e Hagës lidershipin e Beogradit.
Të thuash dhe të bësh, janë dy gjëra të ndryshme në politikë. Historia ja ka dhënë serbëve dhe shqiptarëve mësimet e saj.
Dialogu është opsion i zgjidhjeve europiane dhe ka raport me të vërtetën e paqes që duan kombet në rajon. Kjo e vërtetë fton gjakftohtësinë të kuptojë. Politikan nuk të bën lufta. E kundërta është e vërtetë.
Trim nuk të bëjnë deklaratat e luftës. Kjo është po aq e vërtetë sa fakti se një tren nuk bëhet kishë me piktura fetare.
Të kuptuarit e luftës është akt dhe jo deklaratë. Kjo do pak mençuri në të kuptuar, e cila kombit serb, si rregull, nuk i ka munguar.
Për më tepër, shqiptarët kanë një të metë kombëtare. Ata janë më të aftë në luftë se sa në paqe. Sigurisht.
