Albin Kurti ka reaguar për herë të parë pas shpalljes së datës së zgjedhjeve të jashtëzakonshme që do mbahen me datë 28 dhjetor të këtij viti, transmeton InfoShqip.
“Dita e zgjedhjeve është festë e demokracisë – momenti kur qytetarët, me të drejtën e tyre të votës, i japin formë së ardhmes së vendit. Kjo festë bëhet edhe më madhështore kur pjesëmarrja është e gjerë, e kur zëri i secilit qytetar dëgjohet në mënyrë të barabartë.
Në këtë kontekst, rëndësi të veçantë merr edhe përgatitja institucionale. Procesi zgjedhor duhet të jetë i rregullt, i drejtë dhe plotësisht demokratik. Kjo kërkon kohë, organizim dhe angazhim të palëkundur të institucioneve shtetërore.
Pikërisht për këto arsye, u mirëprit vendimi i Presidentes së vendit, Vjosa Osmani-Sadriu, për caktimin e datës 28 dhjetor si ditën më të përshtatshme për mbajtjen e zgjedhjeve të parakohshme. Ky përcaktim konsiderohet moment i rëndësishëm që garanton jo vetëm qetësi institucionale, por edhe funksionim të pandërprerë të procesit demokratik.
Me 28 dhjetorin, Kosova hyn në një kapitull të ri të shprehjes qytetare – një datë që pritet të shënojë pjesëmarrje të gjerë dhe vullnet të qartë për drejtimin që vendi do të marrë në vitet e ardhshme.” shkruan Kurti.
