Juristi Adem Çuçul është propozuar nga Komisioni për Çështje të Zgjedhjeve dhe Emërimeve në Kuvend si kandidat për kryetar të ri të Komisionit Shtetëror për Parandalimin e Korrupsionit (KSHPK). Sipas Komisionit për seleksionimin e kandidatëve, Çuçul ka marrë vlerësimin më të lartë me 96.5 pikë. Ai aktualisht është sekretar i përgjithshëm i KSHPK-së dhe punon në këtë institucion prej 19 vitesh.
Komisioni për Çështje të Zgjedhjeve dhe Emërimeve vendosi njëzëri që Kuvendit t’i propozohet emërimi i Çuçul si kryetar. Sipas informacioneve nga Kuvendi, seanca plenare ku do të votohet ky propozim pritet të mbahet në fillim të dhjetorit.
Komisioni për seleksionimin e kandidatëve vlerësoi se Çuçul ka përvojë të konsiderueshme në parandalimin e korrupsionit dhe konfliktit të interesit, si dhe ka një vizion të qartë dhe një plan konkret për funksionimin dhe zhvillimin e KSHPK-së.
Thirrja për aplikim për kryetar të KSHPK-së ishte publikuar gjatë verës, por procedura ishte pezulluar përkohësisht për shkak të zgjedhjeve lokale.
Nga 13 kandidatët që aplikuan, 10 u seleksionuan për intervista, të cilat nisën të martën.
Në rast se votohet nga Kuvendi, Adem Çuçul pritet të marrë drejtimin e KSHPK-së në vend të Tatjana Dimitrovska, e cila dha dorëheqje pasi u akuzua në rastin “Aditiv”, për shpërdorim të sekretit zyrtar dhe falsifikim kompjuterik.
Sipas aktakuzës, ajo i kishte dhënë informacion të mbrojtur me ligj të akuzuarit në këtë rast.
