Çdo i treti qytetar në Maqedoni ka paguar një lloj ryshfeti për të kryer ndonjë punë, sipas të dhënave të fundit nga Raporti i Vlerësimit të Korrupsionit i Qendrës Maqedonase për Bashkëpunim Ndërkombëtar (MCIC). Drejtori i MCIC, Aleksandar Krzalovski, tha në një aktivitet kushtuar Ditës Ndërkombëtare Kundër Korrupsionit se 37% e qytetarëve u është kërkuar ryshfet dhe 31% me të vërtet kanë paguar ryshfet.
Sipas raportit, korrupsioni është tani problemi i dytë më i madh shoqëror, por ai mbetet i përhapur dhe, siç vuri në dukje Krzalovski, “fatkeqësisht mjaft i pranuar”.
Besimi te gjyqtarët dhe prokurorët është më i ulëti midis institucioneve, ndërsa besimi te Parlamenti është relativisht i lartë.
BE-ja, nëpërmjet Zëvendës Shefit të Delegacionit të saj, Ben Nupnau, përsëriti mbështetjen e saj për luftën kundër korrupsionit, por paralajmëroi se nuk ka pasur përparim në këtë fushë për tre vjet me radhë. Ai bëri thirrje për miratimin e një Kodi të ri Penal, reforma dhe depolitizimin e plotë të gjyqësorit.
Ambasadorët e Zvicrës dhe Suedisë, Christoph Sommer dhe Ola Sulstrom, theksuan nevojën për një qasje sistemike dhe një luftë të vazhdueshme ditore kundër korrupsionit, ndërsa OSBE-ja theksoi se rezultatet efektive kërkojnë individë që do të shtyjnë në mënyrë aktive për reforma.
