Me titullin praktikisht të fituar, Barcelona vijon luftën për të realizuar një tjetër objektiv, të mbyllë sezonin pa humbje.
Në ndeshjen e vlefshme për javën e 33-të, katalanasit morën një barazim 2-2 në transfertën e vështirë ndaj Celta Vigos, fushë në të cilën Barça ka pësuar shpesh disfata të bujshme.
Dembele kaloi në avantazh skuadrën e Valverdes në minutën e 36-të, por në të 45’ ishte Jonny, që çoi ekipet në dhomat e zhveshjes, në barazim 1-1.
Katalanët kaluan edhe njëherë në avantazh me anë të Paco Alcacer në minutën e 64-t, ndërsa vetëm 7 minuta më vonë, Sergi Roberto u ndëshkua me karton të kuq dhe la skuadrën me 10 futbollistë.
Epërsinë numerike e shfrytëzoi mjaft mirë Celta, që gjeti golin e barazimit më anë të Aspas në minutën e 83-të dhe fiksoi shifrat finale 2-2.
Me këtë barazim Barcelona bën 40 ndeshje pa humbje në La Liga dhe ndjek rekordin e Arsenalit, i cili nuk pësoi humbje në 49 ndeshje të Premier Ligës.
Barcelona vijon të jetë e shkëputur 12 pikë ndaj Atleticos së Madridit, që e ndjek dhe titulli është shumë pranë, pasi kanë mbetur vetëm 5 takime për t’u luajtur.
