Presidenti i SHBA-së, Donald Trump ka shkarkuar Prokuroren e Përgjithshme Pam Bondi. Në një postim online, ai shkroi se Bondi “është një patriote e madhe amerikane dhe një mike besnike”, duke shtuar se “vrasjet kanë rënë në nivelet e tyre më të ulëta që nga viti 1900” gjatë mandatit të saj. Ai njoftoi se ajo do të kalojë në sektorin privat, në një pozicion që do të shpallet së shpejti.
Zëvendës-prokurori i Përgjithshëm Todd Blanch, të cilin Trump e përshkroi si “një mendje ligjore jashtëzakonisht të talentuar dhe të respektuar”, do të marrë detyrën si Prokuror i Përgjithshëm në detyrë.
Lajmet e mediave amerikane tregojnë se Bondi u informua për shkarkimin e saj në një takim me Trump në Zyrën Ovale të mërkurën në mbrëmje, përpara deklaratës të tij për luftën në Iran. Një nga burimet tha se kur presidenti iu drejtua kombit, Bondi e kishte humbur tashmë postin e saj dhe po kthehej në Florida.
Megjithatë, një zëdhënës i Departamentit të Drejtësisë e mohoi lajmin, duke vënë në dukje se Bondi ishte pranë presidentit gjatë fjalimit të tij një ditë më parë. Trump po konsideron kreun e Agjencisë për Mbrojtjen e Mjedisit, Lee Zeldin, si një zëvendësim të mundshëm.
Sipas burimeve të FoxNews, të dy burrat u takuan të martën në Shtëpinë e Bardhë, ku u diskutua mundësia e një ndryshimi në udhëheqjen e Departamentit të Drejtësisë.
Kjo lëvizje u parapri nga një raport i “New York Times” që fliste për pakënaqësinë në rritje të Trump me Bondin. Trump po “acarohej gjithnjë e më shumë” me të, sipas një personi të brendshëm në Shtëpinë e Bardhë, duke shtuar se teksa Trump i pëlqen ajo si person, nuk mendon se ajo e ka “realizuar vizionin e tij” në mënyrën që ai dëshiron.
Dy burime i thanë “NBC News” se Trump dhe Bondi patën një debat të nxehtë në Shtëpinë e Bardhë javën e kaluar, pa specifikuar se për çfarë ishte debati.
Sipas informacioneve nga “Wall Street Journal”, Trump kishte shprehur pakënaqësi me performancën e Bondit për muaj të tërë, duke e përshkruar atë si të pamjaftueshme dhe duke besuar se ajo ishte e ngadaltë në ndjekjen penale të individëve që ai kishte shënjestruar.
Trajtimi i çështjes Jeffrey Epstein shkaktoi gjithashtu një tension të veçantë, i cili, sipas të njëjtave burime, i ngarkoi presidentit një barrë politike.
Bondi kishte ndërmarrë iniciativë për të hetuar humbjen e Trump në zgjedhjet e vitit 2020, duke miratuar hetime në nivel federal dhe gjithashtu kishte autorizuar veprime të FBI-së për të mbledhur materiale zgjedhore.
Pavarësisht tensioneve, Trump herë pas here ka mbajtur një qëndrim personal pozitiv ndaj saj, pasi Bondi më parë ka qenë avokatja e tij. Ai kishte deklaruar se “Pam Bondi është një person i mrekullueshëm dhe bën një punë të mirë”.
Ministria e Drejtësisë nuk ka bërë ende asnjë koment. /LAPSI.al/
