I ashtuquajturi drejtor i zyrës së qeverisë së Serbisë për Kosovë Marko Gjuriq ka deklaruar sot se urdhër arresti për zëvendëskryetarin e Listës Serbe Millan Radoiçiq dhe aktakuza kundër ish ministrit në qeverinë e Kosovës Ivan Todosijeviq, “janë mesazh për serbët se rezistenca e tyre është e pashpresë dhe se “vetë dëshirës së Prishtinës” nuk mund t’i ikin as liderët lokalë politikë serbë”.
Gjuriq ka pretenduar se “gjuetia ndaj funksionarëve të Listës Serbe është pjesë e luftës speciale me të cilën Prishtina po mundohet të krijojë bindje se serbët në veri të Kosovës nuk kanë asnjë mbrojtje sistemore”.
“Me mesazh se drejtësia kosovare është nën projektin e dominimit të plotë të shqiptarëve në Kosovën e vetëshpallur, serbëve iu sugjerohet që çdonjëri prej tyre mund të gjendet nën goditje të një sistemi të tillë dhe se për ta nuk vlen asnjë e drejtë njerëzore dhe demokratike”, ka pretenduar Gjuriq.
Ai i ka porositur serbët në Kosovë se “duhet të dinë se Serbia është garantuese e sigurisë dhe dinjitetit të tyre dhe se në mënyrë më të vendosur do t’i kundërvihet përpjekjeve të dominimit të Prishtinës nëpër hapësirat serbe në Kosovë”.
