Irani ka kërcënuar sot se do të nisë sulme hakmarrëse ndaj qendrave bankare amerikane dhe izraelite në rajon, pas një sulmi ajror ndaj një banke në Teheran.
Në një deklaratë, një zëdhënës i Shtabit Qendror Khatam al-Anbiya, komandës së përbashkët të forcave të armatosura të Iranit, tha se një bankë në kryeqytetin iranian u godit nga SHBA-ja dhe Izraeli të martën. Ai e përshkroi sulmin si një “akt lufte të paligjshëm dhe jokonvencional” dhe shtoi se ky incident i jep forcave iraniane të drejtën për të synuar qendrat ekonomike dhe bankat e SHBA-së dhe Izraelit në të gjithë rajonin.
“Amerikanët duhet të presin veprimin tonë të dhimbshëm hakmarrës,” paralajmëroi zëdhënësi, i cili bëri thirrje që qytetarët të qëndrojnë larg një kilometër nga bankat amerikane dhe izraelite që mund të jenë të prekura.
Sipas mediave shtetërore iraniane, disa punonjës bankash u vranë gjatë sulmit në një bankë në veri të Teheranit. Raportet tregojnë se ata po punonin një turn shtesë për të përgatitur shpërndarjen e pagave të fundmuajit të shkurtit kur ndodhi sulmi.
Autoritetet iraniane raportojnë se që nga sulmi i përbashkët i SHBA-së dhe Izraelit më 28 shkurt, në Iran janë vrarë mbi 1.200 persona, përfshirë udhëheqësin suprem të atëhershëm Ali Khamenei dhe zyrtarë të lartë ushtarakë, ndërsa mbi 10,000 të tjerë janë plagosur.
Ceremonitë mortore për komandantët e vrarë, përfshirë ish-komandantin e Gardës Revolucionare Mohammad Pakpour, ish-shefin e shtabit të forcave të armatosura Abdolrahim Mosavi dhe ish-shefin e Këshillit të Mbrojtjes Ali Shamkhani, do të zhvillohen të mërkurën pasdite në Teheran.
Teherani ka nisur hakmarrje me sulme me dronë dhe raketa, duke shënjestruar Izraelin, Jordaninë, Irakun dhe vendet e Gjirit ku ndodhen bazat ushtarake amerikane.
