Ish-ministri i Jashtëm i Iranit, Mohammad Javad Zarif, ka deklaruar se Teherani duhet të përdorë “dorën e sipërme” në konflikt për të arritur një marrëveshje gjithëpërfshirëse paqeje me Shtetet e Bashkuara të Amerikës, duke i dhënë fund dekadave të armiqësisë mes dy vendeve.
Në një artikull për Foreign Affairs, Zarif theksoi se Irani nuk duhet ta përdorë epërsinë për të vazhduar luftën, por për të shpallur fitoren dhe për të negociuar një marrëveshje që shmang konfliktet e ardhshme.
Sipas tij, një marrëveshje e tillë duhet të përfshijë kufizime mbi programin bërthamor të Iranit dhe rihapjen e Ngushtica e Hormuzit, një arterie kyçe e tregtisë globale, në këmbim të heqjes së sanksioneve ekonomike ndaj Teheranit. Zarif e cilësoi këtë si një marrëveshje që më parë nuk do të ishte pranuar nga Uashingtoni, por që mund të jetë e pranueshme në kushtet aktuale.
Ai shtoi se, në një kohë kur kostot e konfliktit po rriten globalisht dhe SHBA po përballet me izolim më të madh, Irani duhet të synojë një pakt mossulmimi me Uashingtonin, ku të dy vendet angazhohen të mos sulmojnë njëri-tjetrin në të ardhmen.
Zarif theksoi se një marrëveshje e tillë do t’i lejonte autoritetet iraniane të fokusohen më shumë në përmirësimin e kushteve të jetesës për qytetarët, sesa në përballjen me kërcënimet e jashtme.
