Kabineti izraelit i sigurisë miratoi planin për forcimin e ajrore me avionët luftarakë dhe pajisjet e sofistikuara ushtarake me vlerë 9 miliardë dollarë që do të blejë nga Shtetet e Bashkuara të Amerikës (ShBA). Sipas lajmit të medias publike të Izraelit (KAN) plani në fjalë është miratuar me 3 muaj vonesë.
Plani parashikon blerjen nga ShBA-ja të avionëve e helikopterëve luftarakë dhe avionëve cisternë për furnizimin me karburant në ajër. Në mbledhjen 7-orëshe të kabinetit ishte i pranishëm edhe ministri i Mbrojtjes, Benny Gantz.
Sipas televizionit KAN, Ministria e Financave e kundërshtoi marrëveshjen pasi Tel-Avivit zyrtar do t’i duhet të marrë kredi nga bankat amerikane për të financuar planin dhe kjo do të nënkuptojë një rënie të mbështetjes vjetore që ShBA-ja i jep Izraelit.
Disa nga produktet e industrisë së mbrojtjes që Izraeli ka në plan të blejë nga ShBA-ja janë: helikopterë të tipit «Chinook», aeroplanë luftarakë tip «F-35» dhe «F-16», bomba dhe armë të sofistikuara.
ShBA-ja është mbështetësi më i madh ushtarak i Izraelit. Në vitin 2018 Uashingtoni njoftoi se brenda 10 viteve do të sigurojë 38 miliardë dollarë ndihma ushtarake për këtë vend.
