Moderatorja e njohur Kiara Tito ishte e ftuar këtë të hënë në emisionin “Ndryshe” me Salsano Rapin dhe Elona Duron në Top Albania Radio, ku ndau detaje të veçanta nga jeta e saj personale dhe profesionale.
Ajo foli për rrugëtimin në media, lidhjen me familjen dhe projektet që pritet t’i sjellë së shpejti.
Gjatë intervistës, Kiara zbuloi për herë të parë një projekt të ri që po përgatit së bashku me bashkëshortin e saj, Luiz Ejllin – një film që tashmë ka hyrë në fazën e parë të planifikimit.
“Jemi duke u organizuar për të bërë një film bashkë, është hera e parë që e them. Ai e ka thënë pak edhe në Story megjithatë nuk kishte asgjë konkrete. Tani është momenti që ne jemi në fillimet tona sepse filmi normalisht që do shumë kohë që të dalë, por ky është një projekt që ne kemi dëshirë që ta bëjmë sa më shpejt. Në vazhdimësi do t’i mbledhim të gjitha detajet,” tha Kiara.
E pyetur nëse filmi do të jetë një komedi apo do të fokusohet te historia e tyre e dashurisë, ajo shtoi:
“Sigurisht që do të ketë edhe dashuri brenda, ku do shkojmë ne të dy pa transmetuar pak dashuri?!”
