Maqedonia humbet rreth 4,000 jetë çdo vit si pasojë e pirjes së duhanit ose produkteve të tij. Numri i duhanpirësve aktivë në vend është 40.4 për qind e popullsisë, dhe vetëm pesë për qind e duhanpirësve kanë arritur ta lënë duhanin vitet e fundit, sipas një studimi të Institutit të Shëndetit Publik.
Sipas të dhënave nga Organizata Botërore e Shëndetësisë (OBSH), 40 për qind e të rinjve në Maqedoni në moshën 14 vjeç tashmë pinë duhan, megjithëse ligji ndalon shitjen e cigareve tek të miturit. Përqindja e popullsisë që përdor duhan e vendos Maqedoninë midis vendeve me shkallët më të larta të duhanpirësve aktivë.
“Vetëm pesë për qind kanë arritur ta lënë duhanin vitet e fundit. Mesatarisht, një duhanpirës aktiv konsumon deri në 18 cigare në ditë. Është shqetësuese që fëmijët dhe të rinjtë janë të ekspozuar ndaj tymit të duhanit në shtëpi dhe hapësira publike gjatë një periudhe kur sistemi i tyre kardiovaskular është në zhvillim e sipër, gjë që krijon dëmtime të përhershme dhe rrit rrezikun e sëmundjeve kardiovaskulare në moshë të re. Ekspozimi ndaj tymit pasiv të duhanit mbart rrezik të konsiderueshëm kardiovaskular”, thonë mjekët.
“Shtatë nga dhjetë përdorues të duhanit e fillojnë kur janë të mitur. Vetëm pesë për qind arrijnë të heqin qafe varësinë. Pirja e duhanit rrit rrezikun e sëmundjeve kardiovaskulare dhe krijon paqëndrueshmëri afatgjatë të sigurimit shëndetësor” shpjegojnë ata.
Megjithatë, masa të rrepta ndaj duhanpirësve do të jenë të vështira për t’u zbatuar. “Qeveria do të jetë nën një presion të madh. Rreziqet janë të larta, pasi industria është shumë e fortë. Komuniteti i biznesit që mbështet atë industri ka ndikim të madh midis autoriteteve shëndetësore,” thonë ekspertët.
