Memli Krasniqi ka bërë të ditur se në zgjedhjet e 28 dhjetorit nuk do të jetë kandidat për deputet, duke zgjedhur t’i përkushtohet plotësisht drejtimit të fushatës zgjedhore të Partisë Demokratike të Kosovës, raporton Euronews.
Me vendim të kryesisë së PDK-së, ai do të marrë rolin e Shefit të Shtabit Qendror Zgjedhor, ndërsa thekson se ky vendim i jep hapësirë të angazhohet tërësisht në mbështetje të kandidatit për kryeministër, Bedri Hamza.
“Sot, me vendim të Kryesisë së Partisë Demokratike të Kosovës, kam marrë përsipër përgjegjësinë për të udhëhequr fushatën zgjedhore të partisë, si Shef i Shtabit Qendror Zgjedhor, në rrugën tonë drejt fitores më 28 dhjetor.
Këto zgjedhje janë mundësi për t’i rikthyer vendit normalitetin, stabilitetin dhe zhvillimin. PDK hyn në këtë proces më e përgatitur, e bashkuar dhe shumë e gatshme për t’i dhënë vendit drejtimin që meriton.
Në këtë fushatë, do të jem plotësisht në shërbim të fushatës sonë, të ekipit, të strukturave dhe të fitores sonë të përbashkët. Prandaj, pas shtatë mandateve si deputet i Kuvendit të Kosovës, këtë herë kam vendosur që të mos jem pjesë e listës tonë zgjedhore.
Ky është një vendim i qëllimshëm, që më lejon t’i përkushtohem tërësisht organizimit dhe udhëheqjes së fushatës dhe mbështetjes së plotë për Kryetarin dhe kandidatin tonë për Kryeministër, Bedri Hamza.
Ecim bashkë, me besim dhe vendosmëri, për një Kosovë ma të mirë për të gjithë!”, shkruan Memli Krasniqi.
