Një lajm i mirë vjen nga Italia ku u konfirmua se një vaksinë e prodhuar atje, ka funksionuar tek qelizat njerëzore.
Pohimin e bëri dr. Luigi Aurisicchio, administrator i institutit Spallanzani në Itali, duke folur me agjencinë e lajmeve ANSA.
“Për herë të parë në botë, një vaksinë kandidate kundër koronavirusit të ri ka neutralizuar virusin në qelizat humane. Ky është niveli më i avancuar deri sot i një vaksine të prodhuar në Itali.
Shkencëtari tha se testet e gjera te njerëzit në institutin e Virologjisë do të bëhen në fund të kësaj vere.
Testi u bë i mundur në sajë të përvojës së institutit, i cili pasi izoloi koronavirusin, aplikoi një metodë për të verifikuar efektivitetin e vaksinave dhe molekulave direkt në virus.
“Ne po eksplorojmë edhe platforma të tjera interesante teknologjike në bashkëpunim me LineaRx, një kompani amerikane. Disa vaksina kanë marrë fonde të rëndësishme dhe tashmë kanë filluar fazën klinike në vendet e tjera. Ne po punojmë për një vaksinë që vjen nga hulumtimi italian, me teknologji gjithëpërfshirëse dhe italiane, që të testohet në Itali dhe të vihet në dispozicion të të gjithëve.
Për ta bërë këtë kemi nevojë për mbështetjen e institucioneve dhe partnerëve të cilët mund të na ndihmojnë të shpejtojmë procesin: kjo nuk është një garë, së bashku mund të fitojmë të gjithë kundër koronavirusit “, tha Aurisicchio.
Testet e kryera në laboratorin e Virologjisë të institutit Spallanzani treguan gjithashtu se antitrupat e gjeneruar tek minjtë e vaksinuar, funksiononin.
