Zëdhënësi i Kremlinit thotë se Rusia do të detyrohet të ndërmarrë hapa nëse baza ushtarake turke vendoset në Azerbajxhan. Qeveria ruse tha të premten se vendi po ndjek nga afër zhvillimet rreth një baze të mundshme ushtarake turke në Azerbajxhan, “një veprim që mund t’i kërkojë Rusisë të ndërmarrë hapa për të siguruar sigurinë dhe interesat e veta“, transmeton InfoShqip.
Zëdhënësi i Kremlinit Dmitry Peskov tha se Rusia ishte në kontakt të ngushtë me Turqinë, një anëtare e NATO-s, në lidhje me stabilizimin e situatës në Kaukazin e Jugut, ku ushtria Azerbajxhanase çliroi territoret e saj nga pushtimi armenian tre dekadash vitin e kaluar.
Turqia dhe Azerbajxhani ranë dakord të martën për të rritur bashkëpunimin në sferën ushtarake, duke nënshkruar një deklaratë në qytetin Shusha, një territor që Azerbajxhani çliroi gjatë luftimeve të vitit të kaluar.
Presidenti i Azerbajxhanit Ilham Aliyev tha se deklarata parashikon bashkëpunimin në çështjet politike, ekonomike, tregtare dhe të energjisë.
“Por më e rëndësishmja është marrëveshja mbi bashkëpunimin midis Azerbajxhanit dhe Turqisë në fushën e industrisë së mbrojtjes dhe ndihmës së ndërsjellë ushtarake,” tha Aliyev në një konferencë shtypi me Presidentin turk Rexhep Tajip Erdogan të martën, transmeton InfoShqip.
Në deklaratat e tij të enjten, Erdogan nuk përjashtoi ndërtimin e një baze ushtarake turke në Azerbajxhan. I pyetur në lidhje me mundësinë e krijimit të një baze ushtarake turke në Azerbajxhan, zëdhënësi i Kremlinit Dmitry Peskov komentoi mbi këto njoftime:
“Vendosja e infrastrukturës ushtarake nga vendet e NATO-s pranë kufijve tanë është arsyeja për vëmendjen tonë të veçantë, si dhe arsyeja që ne po ndërmarrim hapa për të siguruar sigurinë dhe interesat tona.”
Kaukazi i Jugut, pjesë e ish-Bashkimit Sovjetik, është me interes të veçantë për Rusinë, e cila tradicionalisht e konsideron atë sferën e saj të ndikimit.
Paqeruajtësit rusë janë vendosur në Nago-Karabak që nga konflikti i vitit të kaluar dhe Moska ka një bazë ushtarake në Armeninë fqinje./InfoShqip.com
