Ish-kryeministri britanik Tony Blair mund të luajë një rol udhëheqës në një autoritet të ardhshëm kalimtar në Gaza, i cili do të krijohet si pjesë e planit të paqes të Shteteve të Bashkuara, raportuan sot mediat britanike.
Ish-lideri i Partisë Laburiste, i cili shërbeu si kryeministër britanik midis viteve 1997 dhe 2007, ishte i përfshirë në diskutime me administratën Trump dhe zyrtarë të tjerë rreth të ardhmes së territorit palestinez pas luftës.
Sipas BBC-së dhe revistës The Economist, Tony Blair mund ta udhëheqë këtë autoritet të ardhshëm me mbështetjen e OKB-së dhe vendeve të Gjirit.
Nga ana e saj, gazeta Financial Times shkruan se Blair, i cili luajti një rol ndërmjetësues për paqen në Lindjen e Mesme nga viti 2007 deri në vitin 2015, thuhet se ka kërkuar të bashkohet me bordin e saj mbikëqyrës.
Fondacioni i Tony Blair, Instituti Tony Blair për Ndryshim Global, nuk deshi të komentonte mbi këtë informacion për Agence France-Presse.
Një burim pranë ish-kryeministrit konfirmoi se Blair po punon për një plan për t’i dhënë fund konfliktit.
Megjithatë, burimi i tha AFP-së se ish-kryeministri nuk do të mbështeste asnjë propozim për zhvendosjen e përhershme të banorëve të Gazës dhe se çdo autoritet kalimtar do t’ia transferonte pushtetin në planin afatgjatë Autoritetit Palestinez, i cili ka selinë në Ramallah në Bregun Perëndimor.
Sipas The Economist, ky organ, që do të quhet “Autoriteti Ndërkombëtar Tranzitor në Gaza”, do të kërkojë një mandat të OKB-së për t’u njohur si “autoriteti më i lartë politik dhe gjyqësor” për pesë vjet, përpara se t’ua dorëzojë kontrollin palestinezëve.
Fillimisht, ky instrument do të vendoset në Egjipt, përpara se të zhvendoset në enklavë kur të plotësohen kushtet e sigurisë, sipas BBC-së.
Yossi Cohen, ish-kreu i Mossadit, i tha sot radios BBC se i pëlqen shumë kjo ide dhe e quajti Blair-in një “njeri të mrekullueshëm”.
Në vitin 2003, Blair e futi Britaninë në luftën e Irakut në anën e Shteteve të Bashkuara, një vendim që u kritikua gjerësisht në vend. Një hetim i pavarur vendosi në vitin 2016 se ai e kishte ekzagjeruar qëllimisht kërcënimin që paraqiste regjimi irakian.
Në fund të gushtit, sipas BBC-së dhe faqes amerikane të lajmeve Axios, Tony Blair kishte marrë pjesë në një “takim politik” për “të nesërmen” në Gaza, të organizuar nga Shtëpia e Bardhë në prani të Donald Trump.
