Presidenti rus Vladimir Putin mbërriti në Iran të martën, në udhëtimin e tij të parë jashtë kufijve të ish-Bashkimit Sovjetik vendit që nga fillimi i luftës në Ukrainë.
Putin u takua me presidentin iranian Ebrahim Raisi në Teheran dhe është planifikuar një takim me presidentin turk Rexhep Tajip Erdogan, shkruan CNN.
Ai gjithashtu u takua me Udhëheqësin Suprem të Iranit Ayatollah Khamenei, sipas agjencisë shtetërore iraniane të lajmeve IRNA.
“Jam shumë i kënaqur që jam në tokën mikpritëse iraniane. Ne mund të mburremi me shifra rekord sa i përket rritjes së tregtisë. Ne po forcojmë bashkëpunimin tonë për çështjet e sigurisë ndërkombëtare, duke dhënë një kontribut të rëndësishëm në zgjidhjen e konfliktit sirian,” tha Putin.
Disa ditë më parë, këshilltari i Sigurisë Kombëtare në Shtëpinë e Bardhë, Jake Sullivan tha se informacionet e marra nga SHBA sugjeronin se Irani po përgatitej të trajnonte forcat ruse për të përdorur dronët.
Ai shtoi se ishte ende e paqartë nëse Irani i kishte dorëzuar armët.
Marrëdhëniet e Rusisë me Iranin kanë alarmuar zyrtarët perëndimorë, teksa Moska përgatitet të shtojë ofensivën tokësore në Ukrainën lindore pas marrjes së rajonit të Luhanskut.
