Presidenti i Rusisë, Vladimir Putin, ka zhvilluar një bisedë telefonike me homologun e tij serb, Aleksandar Vuçiq, të cilit i ka thënë se Rusia është e përkushtuar për të gjetur një “zgjidhje të ekuilibruar” për çështjen e Kosovës, e cila gjithashtu duhet të miratohet nga Këshilli i Sigurimit i Kombeve të Bashkuara.
“Pala ruse ka konfirmuar qëndrimin e saj parimor për gjetjen e një zgjidhjeje të ekuilibruar që duhet të miratohet nga Këshilli i Sigurimit i OKB-së”, thuhet në deklaratën e presidencës ruse, botuar pas bisedës telefonike midis dy liderëve.
Më tej thuhet se Vuçiqi e ka njoftuar Putinin me vlerësimin e tij të situatës në lidhje me “zgjidhjen paqësore të çështjes së Kosovës”, në pajtim me kontaktet që i ka pasur me partnerët e jashtëm.
Në njoftimin e Kremlinit thuhet po ashtu se “Serbia mund të llogarisë në mbështetjen ruse në zgjidhjen e kësaj, por edhe çështjeve tjera kyçe”.
