Kryeministri shqiptar, Edi Rama shpreson që Shqipëria të hyjë në Bashkimin Evropian së bashku me Serbinë, edhe pse e pranon se kjo e fundit është përpara vendit të tij në procesin e pranimit të BE-së.
Gjatë qëndrimit në Davos, ai ka thënë se kjo mund të ndodhë ‘nëse Serbia e njeh Kosovën’.
“Është një proces i bazuar në performancë. Serbia ka avantazhin tashmë të negociuar dhe ne shpresojmë se do t’i fillojmë negociatat këtë vit. Kjo është një konkurrencë e shëndoshë dhe do të donim t’i përshpejtojmë hapat që në të ardhmën të jemi në të njëjtin pozicion dhe së bashku të hyjm në BE, me supozimin se Serbia e njeh Kosovën”, iu ka thënë Rama gazetarëve në Forumin Ekonomik Botëror.
Rama e pranoi se kishte bërë gabim kur kishte parashikuar se Hillary Clinton do të ishte presidente e SHBA-ve, por ka theksuar se SHBA-të vazhdojnë të mbesin një partner i rëndësishëm për Shqipërinë.
Duke folur për Gjykatën Speciale, Rama ka thënë se nuk është e rrezikshme.
“Mendoj se ky është një proces i pakthyeshëm, ideja për shfuqizimin e gjykatës nuk është e rrezikshme. Ka një debat në lidhje me përmirësimin dhe kjo është një gjë e mirë”.
Sipas tij, Evropa nuk është në gjendje të mirë por ka shtuar se fjalimi i kancelares gjermane, Angela Merkel e inkurajon atë. /albeu
