Një armëpushim humanitar do të hyjë në fuqi nesër në mëngjes në enklavën malore të Nagorno-Karabakut, e cila është shndërruar në një arenë të luftimeve midis Armenisë dhe Azerbajxhanit, njoftoi sot Departamenti i Shtetit.
Njoftimi vjen pasi sekretari i Shtetit Mike Pompeo u takua të premten me ministrat e Jashtëm të Armenisë dhe Azerbajxhanit në Uashington, në një shtytje të re për paqen dhe një takim të bashkë-kryetarëve të Grupit Minsk të OSBE-së, i formuar për të ndërmjetësuar konfliktin.
“Gjatë diskutimeve intensive, bashkëkryetarët dhe ministrat e jashtëm diskutuan zbatimin e një armëpushimi të menjëhershëm humanitar, parametrat e mundshëm për monitorimin e armëpushimit dhe fillimin e diskutimit të elementeve thelbësorë të një zgjidhjeje gjithëpërfshirëse,” thuhet në deklaratën e Grupit të Minskut.
Paralajmërimi për një armëpushim humanitar vjen në kohën kur luftime të reja shpërthyen sot midis Azerbajxhanit dhe forcave etnike armene.
