Presidenti i Shteteve të Bashkuara, Donald Trump, deklaroi në një intervistë telefonike për CNN se ushtria amerikane po e “shkatërron” Iranin, ndërsa paralajmëroi se “vala e madhe” e goditjeve ende nuk ka nisur.
Në bisedën nëntëminutëshe me gazetarin Jake Tapper, Trump u shpreh:
“Po i shkatërrojmë shumë. Mendoj se po shkon shumë mirë. Është shumë e fuqishme. Kemi ushtrinë më të madhe në botë dhe po e përdorim atë”.
Presidenti trajtoi një sërë çështjesh gjatë intervistës, përfshirë kohëzgjatjen e pritshme të konfliktit, reagimin e Iranit dhe zhvillimet e brendshme politike në vend.
Sa i përket zgjatjes së luftës, ai theksoi:
“Nuk dua ta shoh të zgjasë shumë. Gjithmonë kam menduar se do të zgjasë katër javë. Dhe jemi pak përpara afatit.”
I pyetur nëse SHBA-të po ndërmarrin hapa të tjerë përtej sulmeve ushtarake për të ndihmuar popullin iranian të rimarrë kontrollin e vendit nga regjimi aktual, Trump u përgjigj: “Po. Po, po. Por tani për tani duam që të gjithë të qëndrojnë brenda. Nuk është e sigurt atje jashtë.”
Ai paralajmëroi se situata pritet të përshkallëzohet edhe më tej.
“Ne as nuk kemi filluar t’i godasim fort. Vala e madhe as nuk ka ndodhur. E madhja do të vijë së shpejti,” theksoi presidenti amerikan.
