Humbja e kombëtares serbe me Shqipërinë ka sjellë përplasje të forca në Serbi. Media serbe thonë se, presidenti Aleksandër Vuçiç e ka gjetur shkakun e humbjes. Sipas tij, janë protestuesit serbë të cilët kanë lënë pa gjumë futbollistët e kombëtares, duke mos i lënë që të përqendrohen.
Autoritetet kanë akuzuar ata që po protestojnë që nga 1 nëntori i vitit të kaluar për pothuajse çdo gjë, për terrorizëm, për përmbysje të shtetit dhe madje për planifikimin e një atentati ndaj presidentit. Por që të jenë fajtorë edhe për humbjen e futbollistëve serbë ndaj Shqipërisë, kjo mund të thuhet se është një nivel i ri, shkruajnë mediat serbe.
Presidenti Vuçiç pretendon se banorët e Nishit që po protestonin kanë fishkëllyer përpara hotelit ku po qëndronte kombëtarja e tyre para ndeshjes, dhe se i kanë shpërqendruar ata.
Pas humbjes së kombëtares së Serbisë ndaj Shqipërisë, ‘Shqiponjat’ serbe mund të fluturojnë jashtë kualifikimeve për Kupën e Botës 2026. Para tyre ‘fluturoi’ edhe Piksi.
Nga publiku gjatë ndeshjes dëgjoheshin brohoritje: ‘Piksi, ik!’
Dhe ai po largohet. Dragan Stojković-Piksi, me sa duket, nuk do të jetë më trajneri i kombëtares së futbollit të Serbisë.
‘Unë tashmë kam folur me presidentin dhe sekretarin e përgjithshëm. Dikush që është përgjegjës, dhe unë mendoj se jam një person i tillë, kam ofruar dorëheqjen time, sigurisht,’ tha Dragan Stojković Piksi në konferencën për shtyp pas ndeshjes me kombëtaren shqiptare.
Për shkak të trishtimit nga humbja e futbollistëve, dhe jo nga zemërimi, presidenti Vuçiç ka thënë se nuk ka fjetur natën e kaluar. Megjithatë, duket se ai është zgjuar i zemëruar, pasi fajësoi popullin, veçanërisht ata që kanë protestuar kundër qeverisë së tij për gati një vit, për debaklin futbollistik.
‘Doni t’ju kujtoj si e përcollëm kombëtaren dje? Në Nish, për 6-7 orë, kur djemtë po pushonin për ndeshjen, 2-300 qindra qytetarë u mblodhën pikërisht përpara hotelit ku ndodhej kombëtarja jonë. Ata menduan se ishin shqiptarët që po fishkëllenin. Nuk ishin shqiptarët, por bllokuesit, sepse bllokuesit nuk e pëlqyen që 5-6 mijë njerëz që nuk po shqetësonin futbollistët tanë ishin mbledhur në anën tjetër të qytetit… Turp të keni të gjithë! Filloni nga vetja juaj – çfarë keni bërë për vendin tuaj, a keni ndërtuar gjëkundi ndonjë gjë, apo vetëm po e rrëzoni shtetin tuaj?’, tha Vuçiç.
‘Po, ne jemi fajtorë, sepse për shkak të egos tënde e zhvendose ndeshjen në atë fushë të Leskovacit, dhe sepse që nga fillimi i kualifikimeve kemi shënuar gola vetëm kundër Andorrës dhe Letonisë,’ iu përgjigjën studentët në bllokadë Presidentit të Serbisë, përmes rrjeteve sociale.
