Ministri i brendshëm serb Aleksandar Vulin ka thënë se Serbia duhet të jetë politikisht asnjanëse, si edhe ushtarakisht neutrale, sepse BE-ja nuk e ka hall ligjin ose ekonominë, por dëshiron që Beogradi ta njohë Kosovën dhe të heqë dorë nga Republika Srpska.
– Nëse Vuçiç do ta njihte Kosovën e vetëshpallur si shtet, do të merrte Çmimin Nobel për Paqe dhe nëse do të lejonte përmbysjen e Republikës Sërpska, do të ishte komisioneri evropian për çfarëdo që dëshiron të jetë – tha Vulin.
Duke folur për situatën e sigurisë në rajon, sipas tij, asnjë vend nuk mund të thotë se është plotësisht i sigurt, por se përpjekjet për të krijuar një “Shqipëri të Madhe” dhe sulmet gjithnjë e më të hapura ndaj Republika Sërpska janë veçanërisht shqetësuese.
– Çdo rrezikim i serbëve, pavarësisht se ku jetojnë, është një kërcënim për të gjithë serbët dhe shtetin e Serbisë – tha Vulin.
Vulin shtoi se Hashim Thaçi dhe të tjerët që po gjykohen në Hagë nuk do ta marrin “dënimin që meritojnë”, “sepse dënimi me privim nga jeta është hequr”.
