Teksa u luajtën sfidat e grupeve A, B, C dhe D, kanë marrë formë përfundimtare edhe renditjet e këtyre grupeve.
Këto ishin ndeshjet e fundit përsa i përket fazës së grupeve, pasi tashmë ekipet kalojnë në fazën me eliminim direkt, shkruan Albeu.com.
Në grupin A, Manchester United u rendit në vendin e parë, me 15 pikë. Ekipi surpizë i Taulant Xhakës, Baseli, zuri vendin e dytë, me 12 pikë në total.
Grupi B ishte i ekuilibruar, me PSG dhe Bayern Munich që e mbyllën të dyja me nga 15 pikë, por golavarazhi më i mirë i parizienëve në ndeshje direkte, bëri që ekipi i Unai Emery të zinte vendin e parë.
Roma ishte surpriza e grupit C, pasi teksa Chelsea u ndal në barazim me Atleticon e Madridit, italianët fituan ndaj Qarabagut dhe i zunë vendin e parë. Të dyja ekipet e mbyllën me nga 11 pikë në renditje, por fitorja në ndeshje direkte, bëri që ekipi i Di Francescos të linte pas Antonio Conten. Vetëm vendi i tretë për Atletikon e Madridit, që tashmë kalon në Europa Ligë.
Barcelona dhe Juventusi, janë ekipet e kualifikuara nga grupi D. Katalanasit e mbyllën në vendin e parë me 14 pikë, ndërsa bardhezinjtë falë edhe fitores në transfertë me Olympiacosin, hipotekuan vendin e dytë. /albeu.com/
