Pasi që dështoi tentimi për amnisti për të akuzuarit nga Prokuroria Speciale, ish-udhëheqësia e VMRO-DPMNE tanimë po përgatit terrenin për bojkotin e referendumit, për të arritur qëllimin që të bëj pazare me pushtetin kur në Kuvend do të vendoset për ndryshimet kushtetuese për emrin, shkruan javorja Fokus.
A do të jetë çmimi shpëtimi i ish-kryeministrit Nikolla Gruevski, i cili ka përgatitur terren në Hungari, ku kryeministri i atjeshëm Viktor Orban, i ka përgatitur strehim, shkruan javorja maqedonase.
Gruevski konsiderohet si një mik i afërt i Orban dhe se raportet e tyre të mira janë vërejtur edhe gjatë qeverisjes së kaluar. Gruevski kërkoi pasaportën pak muaj më parë për të udhëtuar drejt Hungarisë, por kjo nuk iu lejua nga ana e gjykatës, transmeton INA.
Edhe burgu e pret?
Nëse ish-kryeministri do të dënohet edhe për katër akuzat e tjera të ngritura nga Prokuroria Speciale, ai mund të dënohet me dënimin maksimal deri në 20 vjet burg, duke mos llogaritur dënimin e parë prej 2 vjet që dje iu shqiptua nga Gjykata Penale për rastin “Tanku” për blerjen e Mercedesit 600 mijë euro.
Sipas Kodit penal, dënimet do të variojnë varësisht nga veprat penale, por më se shumti i kanoset burg në tri veprat në rastin “Titanik”. Për bashkëveprim në krim të kryer, Gruevski si i akuzuari i parë në këtë rast kanoset me 5 vjet burg. Gjatë ditëve në vijim, Gruevski sërish do të paraqitet në seancë gjyqësore për katër akuzat e tjera.
Gjykata e Apelit më 30 dhe 31 gusht do të mbajë seancë në të cilën do të diskutojë për ankesën e Gruevskit. Gjykatësja Dobrilla Kacarska e ka shkruar aktgjykimin për Gruevskin dhe Gjoko Popovskin në mbi 200 faqe.
Pas dënimint me burg prej 2 vite për blerjen e makinës luksoze “Mercedes”, Nikolla Gruevski përmes avokatëve të tij dorëzoi ankesë për vendimin e gjykatës. (INA)
