Ministri i Ekonomisë dhe Financave të Qeverisë së Francës, Bruno Le Maire, deklaroi se vendi i tij do të shtyjë taksimin e kompanive digjitale- që si shënjestër ka gjigantët amerikanë si Apple, Amazon e Facebook- të miratuar nga Asambleja Kombëtare e Francës pas premtimit se SHBA nuk do të kundërpërgjigjej me tarifa në mallra franceze. Kjo nismë e francezëve nuk kishte gjetur mbështetje as në bllokun europian dhe ishte kundërshtuar nga disa anëtarë të BE’së e si rrjedhojë francezët kishin vendosur ta vendosin në nivel kombëtar.
Konflikti tregtar i radhës i Presidentit Trump pritet të jetë me BE’në që administrata amerikane e konsideron se e ka tepruar me keqpërdorimin e zemërgjerësisë amerikane dhe si shembull i paraqet deficitin tregtar mes tyre dhe pengesat e vazhdueshme ndaj ndërmarrësve amerikanë në tregun europian. Këtë e kishte paralajmëruar ka kohë tani Presidenti Trump me kërcënimet me tarifa ndaj prodhuesve të automjeteve europiane.
Konflikti ishte më i ashpër me gjermanët që kanë mjaft mospajtime me amerikanët rreth hapjes së tregut gjerman për gazsjellësin rus NordStream2 dhe politikave ekonomike jo të drejta ndaj SHBA’ve.
Por francezët e morën rolin kryesor kur miratuan taksën digjitale që u kritikua mjaft edhe për mungesë arsyetimi të vendosjes dhe natyrës së saj prej paushalli. Miratimi i taksës nga parlamenti francez dhe mbështetja e qeverisë shihet si përpjekje populliste për të fituar pikë tek popullata franceze e pakënaqur me qeverisjen e Macron.
Marrëveshja e arritur mes ministrit francez Le Maire dhe Sekretarit Amerikan të Thesarit, Steven Mnuchin nënkupton se inkasimi i taksës digjitale do të pezullohet deri në dhjetor-deri në përfundimin e zgjedhjeve në SHBA, por nuk do ta anuloj asnjëherë deri në arritjen e një marrëveshje ndërkombëtare për një mënyrë taksimi të bizneseve digjitale. Në të njëjtën kohë Franca nuk do të përballej edhe me tarifat e SHBA’së në 7 miliardë mallra eksporti francez para zgjedhjeve në pranverë në Francën edhe ashtu në telashe me greva dhe pakënaqësi ndaj Emmanuel Macron.