Aktivisti dhe analisti i njohur Arianit Xhaferi ka bërë të ditur sot se ka fituar një ankesë zyrtare ndaj dyqanit Sport Vision në City Mall, pas një praktike që ai e cilëson si mashtruese ndaj konsumatorëve.
Në një postim të publikuar më 27 prill, Xhaferi denoncoi se në dyqanin Sport Vision ishte reklamuar zbritje prej 40%, por në arkë i ishte refuzuar çmimi i zbritur. Përveç reagimit publik në rrjetet sociale, ai vendosi të bëjë edhe një parashtresë pranë Inspektoratit Shtetëror të Tregut, duke u thirrur në të drejtat e tij si konsumator.
“ISHT vendosi në favorin tim dhe subjekti në fjalë tash është i detyruar që mallin në fjalë të ma ofrojë me çmimin e reklamuar, pra për 40% më lirë,” njoftoi Xhaferi.
Ai gjithashtu theksoi rëndësinë e vetëdijes juridike për të drejtat e konsumatorit, duke i bërë thirrje qytetarëve që në raste të ngjashme të veprojnë menjëherë.
“Thjesht ta dini: çmimi i reklamës është çmimi i shitjes. Nëse thonë ndryshe, informoni ata që e dini këtë rregull për të shkurtuar procedurën. Nëse nuk binden, një minutë punë keni,” shkroi ai, duke ndarë edhe linkun për parashtrimin online pranë ISHT: https://www.dpi.gov.mk/index.php/mk/odnosi-so-javnost/prijava-od-gragjani/view/form
Rasti i Xhaferit shërben si shembull konkret i fuqisë që konsumatorët kanë për të kërkuar dhe mbrojtur të drejtat e tyre në një treg që shpesh abuzon me informacionin.
