Avokatët e të drejtave të njeriut në Argjentinë kanë depozituar një ankesë penale në gjykatat federale, duke kërkuar arrestimin e kryeministrit izraelit, Benjamin Netanyahu, në rast se ai shkel territorin e vendit.
Lajmi vjen pas raportimeve për një vizitë të mundshme në shtator, e cila ende nuk është konfirmuar nga qeveria.
Sipas ankesës, e cila u rishikua nga Reuters, Netanyahu dhe autoritetet politike e ushtarake izraelite po hetohen për një episod të ndodhur më 23 mars 2025, kur 15 persona u ekzekutuan, përfshirë edhe disa nga punonjësit e ndihmës që po ndihmonin viktimat e një shpërthimi.
Avokatët argjentinas të të drejtave të njeriut, Rodolfo Yanzon dhe Raji Sourani, drejtues i Qendrës Palestineze për të Drejtat e Njeriut, deklaruan: Netanyahu mbahet përgjegjës penalisht si i përfshirë në krime lufte, për shkaktim të qëllimshëm të vdekjes nga uria; si dhe për krime kundër njerëzimit, përfshirë vrasje, përndjekje dhe veprime të tjera çnjerëzore.
Kjo nuk është hera e parë që kërkohet arrestimi i Netanyahu-t në Argjentinë, një kërkesë e ngjashme u dorëzua në fillim të gushtit nga Shoqata e Punonjësve Shtetërorë (ATE) dhe organizata e të drejtave të njeriut HIJOS.
Netanyahu po përballet me presion global për ofensivën ushtarake të Izraelit në Gaza, që ka shkaktuar mijëra viktima palestineze dhe ka zhvendosur pjesën më të madhe të popullsisë.
Ndërkohë, akuzat për gjenocid dhe krime lufte po shqyrtohen nga Gjykata Ndërkombëtare dhe Gjykata e Lartë Botërore, por Izraeli dhe Netanyahu i mohojnë ato./tvklan.al
