Kandidati i BDI-së për kryetar të Komunës së Çairit, Bujar Osmani, sot braktisi konferencën për media pasi u pyet lidhur me rastin “Monstra”.
Në pyetjen e gazetarëve se a ndjen përgjegjësi për aprovimin e aksionit policor ku u arrestuan dhjetëra shqiptarë të pafajshëm, Osmani u përpoq të shmangte përgjigjen.
“Unë nuk kam qenë ministër atëherë, kam qenë mjek në klinikë. Tre vjet para dhe tre vjet pas nuk kam qenë ministër”, ka thënë Osmani.
Megjithatë, kujtojmë se në vitin 2012, në cilësinë e zëdhënësit të BDI-së, Bujar Osmani publikisht kishte deklaruar se partia e tij kishte dhënë aprovim për aksionin policor që çoi në arrestimin e dhjetëra shqiptarëve në rastin “Monstra”.
“Ne, në bazë të dëshmive që kishim, kemi lejuar një aksion të tillë”, kishte deklaruar Osmani atëherë.
Rasti “Monstra” mbetet një nga plagët më të rënda të drejtësisë dhe politikës në Maqedoninë e Veriut, i cilësuar nga shumë organizata dhe juristë si një proces i montuar ndaj shqiptarëve.
