Ende pa përfunduar punimet, sheshi Skënderbeu po pëson dëmtime të mëdha. Ashensori që lidh katin përdhes me tarracën, ulëse të dëmtuara dhe hapësirat e gjelbra të shkatërruara tërësisht. Sheshi pothuajse është shndërruar në çerdhe për qentë endacakë. Qytetarët shprehen të revoltuar për këtë gjendje.
“Askund nuk funksion si duhet, gjithçka është e shkatërruar, gjithçka është e pa pastër edhe ashensori edhe gjithçka tjetër”.
“Nuk janë kujdes aq shumë, por mirë është që ka filluar si projekt shpresoj ta kryejnë, se për tu kujdes jo, as komuna e Çairit as ato që e ndërtojnë”.
“Kjo është hedhje e parave për qëllime të kota. Po ndërtohet pa plan, po ndërtohet sipas dëshirës së dikujt, nuk ka as plan të përgjithshëm, jo se nuk ka por nuk respektohen, as planet detale, asgjë nuk respektohet, gjithkush bën çfarë të dojë”.
“Kjo është një gabim total. Jo vetëm projekti për sheshin Skënderbeu, por të gjitha projektet që janë nisur nga 2014-ta janë lloj i pa krahasueshëm i shëmtisë së arkitekturës së lashtë”.
Nga Komuna e Çairit thonë se qytetarë të papërgjegjshëm dëmtojnë atë që deri tani është ndërtuar.
“Komuna e Çairit bën monitorimin e pjesës së ndërtuar të Sheshit Skënderbeu përmes kamerave të vendosura në atë hapësirë. Pas vëzhgimit të incizimeve kemi informuar Ministrinë e Brendshme për ndërmarrjen e masave të mëtutjeshme ligjore për dënimin e shkaktarëve të dëmeve. Për parandalimin e dëmtimit të kësaj hapësire në të ardhmen e afërt kemi parashikuar edhe angazhimin e personave adekuat – rojeve”, njoftojnë nga Komuna e Çairit.
Pos këtyre dëmtimeve, projekti tashmë disa herë edhe ka pësuar ndryshime duke bërë që mjeshtrit të prioshin muret që dikur kishin ndërtuar. Afati i parë për përmbylljen e punimeve për projektin ‘ sheshi Skënderbeu’ ishte viti 2014. I njëjti ishte paraparë që të ndërtohet në tre faza. Faza e parë u përfundua në vitin 2013, faza e dytë filloi vitin e kaluar dhe punimet ende po vazhdojnë. Punimet për fazën e tretë të projektit nuk dihet se kur do të fillojnë në të cilën është paraparë ndërtimi i parkingut nëntokësor. Kostoja e përgjithshme e projektit kap vlerën prej rreth 10 milion eurove./Alsat-m