Lideri i BDI-së, Ali Ahmeti, i ftuar në një emision të TV “24 Vesti”, ka folur lidhur me zgjedhjet parlamentare që do të mbahen më 11 dhjetor në Republikën e Maqedonisë.
Ahmeti ka folur për një sërë çështjesh të cilat ai dhe partia e tij do t’i kenë primare nëse fitojnë zgjedhjet e dhjetorit që do të mbahen këtë të dielë.
Ai ka thënë se fillimisht, shpreson që zgjedhjet të jetë demokratike dhe që të reflektohet në vullnetin e votuesve, pasi po monitorohen edhe nga ndërkombëtarët.
Lidhur me partitë multinacionale, Ahmeti ka thënë se për sa i takon përpjekes së LSDM-së për të fituar vota të shqiptarëve, për momentin nuk ka kushte për parti të përziera maqedono-shqiptare, duke shtuar se kjo do të mund të arrihet pas së paku një dekade.
I pyetur për zyrtarizimin e gjuhës shqipe, Ahmeti ka thënë se konsensualiteti, barazia ekonomike dhe gjuhësore, përfaqësimi adekuat janë shtyllat e Marrëveshjes së Ohrit dhe nuk ka mbështetës më të madh se BDI-ja të këtij dokumenti.
“Çështja shumë aktuale e gjuhës ëshë zgjidhur që në vitin 2001 me Marrëveshjen e Ohrit por mungon implementimi i saj – dhe nuk është aspak e lehtë të bëhet kjo.
Në këtë marrëveshje shkruan e zeza mbi të bardhë se ‘Gjuha të cilën e flasin mbi 20% e popullsisë në Republikën e Maqedonisë është gjuhë zyrtare’, pra në Republikën e Maqedonisë dhe jo në një komunë apo një tjetër – në gjithë territorin”, ka thënë Ali Ahmeti.
Gjatë bisedës, Ahmeti ka folur edhe për përgjimet.
“Më kanë përgjuar të gjithë që nga Cërvenkovski deri te Gruevski dhe u kam thënë se kot lodhen, unë e them çdoherë të njejtën gjë, si në takime bilaterale ashtu edhe në biseda telefonike”, duke shtuar se ai nuk do të padisë askënd.
