Fluturimet ndërkombëtare po përballen me anulime dhe vonesa të shumta pas sulmeve ajrore të Izraelit ndaj Iranit, të cilat kanë shkaktuar mbylljen e hapësirës ajrore mbi disa shtete të Lindjes së Mesme.
Kompania ajrore Emirates Airlines ka njoftuar anulimin e të gjitha fluturimeve nga dhe për në Irak, Iran, Jordani dhe Liban, për shkak të situatës aktuale në rajon. Po ashtu, aeroportet ndërkombëtare të Dubait po përballen me vonesa të fluturimeve, ndërsa pasagjerët këshillohen të kontrollojnë statusin e fluturimeve të tyre.
Këto ndërprerje kanë ndodhur pas sulmeve ajrore të Izraelit ndaj Iranit, të cilat kanë përfshirë objektiva bërthamore dhe ushtarake. Si pasojë, hapësira ajrore mbi Iran, Irak, Siri dhe Jordani është mbyllur, duke detyruar linjat ajrore të riorientojnë ose anulojnë fluturimet për të siguruar sigurinë e pasagjerëve dhe ekuipazhit.
Autoritetet ajrore këshillojnë pasagjerët të kontaktojnë linjat ajrore për informacion të azhurnuar dhe të shmangin udhëtimet në këto destinacione derisa situata të stabilizohet./abcnews.al
