SHBA dhe BE garantuan se serbët që vendosën postblloqe nuk do të përballen me ndjekje penale, thotë presidenti serb – Blloqe rrugësh në Kosovë u ngritën më 10 dhjetor, pas arrestimit të një ish-polici serb.
Serbët e Kosovës, të cilët kanë bllokuar rrugët në veri të saj për 19 ditë, ranë dakord të fillojnë heqjen e barrikadave në mëngjes pas presionit nga SHBA dhe BE për të ulur tensionet.
Presidenti i Serbisë, Aleksandar Vuçiç, pas një takimi me banorët serbë të veriut të Kosovës në qytetin serb të Rashkës, ka konfirmuar se heqja e postblloqeve do të fillojë në mëngjes.
“Është një proces i gjatë, do të marrë kohë”, theksoi Vuçiç.
Ai shtoi se Uashingtoni dhe Brukseli, të cilët po ndërmjetësojnë bisedimet e Beogradit dhe Prishtinës për të zgjidhur çështjet e pazgjidhura, kanë garantuar se serbët që ngritën postblloqe nuk do të përballen me ndjekje penale.
Për më shumë se 20 vjet, Kosova ka qenë një burim tensioni midis Perëndimit, pjesa më e madhe e të cilit mbështeti pavarësinë e saj, dhe Rusisë, e cila mbështet Serbinë në përpjekjen e saj për të bllokuar anëtarësimin e Prishtinës në organizatat ndërkombëtare, përfshirë OKB-në.
SHBA, NATO dhe BE u kërkuan palëve të ushtrojnë përmbajtje maksimale pasi autoritetet në Kosovë mbyllën një pikë të tretë kufitare të mërkurën dhe tensionet me serbët e rajonit u rritën më tej.
KFOR-i, misioni i NATO-s në Kosovë, siguroi se mbështet “dialogun” e palëve për të de-përshkallëzuar tensionin, pas disa ditësh incidentesh.
Të hënën, Beogradi e vendosi ushtrinë serbe në “nivelin më të lartë të gatishmërisë luftarake”.
Kremlini mohoi akuzat e MPB-së së Kosovës se kërkon ta “destabilizojë”, ndërsa vlerësoi se Beogradi po mbron të drejtat e serbëve në rajon.
Barrikadat në veri të Kosovës u ngritën pas 10 dhjetorit, pas arrestimit të një ish-polici serb, duke paralizuar trafikun. Gjykata vendosi ta lirojë nga burgu dhe ta vendosë në arrest shtëpiak me rekomandim të prokurorit, duke shkaktuar zemërim dhe reagim në Prishtinë, veçanërisht nga kryeministri Albin Kurti: “Jam shumë kurioz të di se cili prokuror e ka rekomanduar dhe cili gjyqtar e miratoi”, tha kreu i qeverisë së Kosovës.
