Karim Benzema ka shkruar emrin me shkronja të arta në historinë e Real Madridit me dy golat e shënuar kundër Cadizit të mërkurën në mbrëmje.
Francezi shënoi kundër ekipit të tij të 35-të të ndryshëm në La Liga, duke barazuar rekordin e legjendës së klubit, Raul Gonzalez, i cili ishte lojtari që iu kishte shënuar më shumë kundërshtarëve për Real Madridin.
Një gjë të tillë dhe një moment historik si ky rekord nuk e kishte arritur as ish-sulmuesi portugez i Los Blancos, Cristiano Ronaldo.
Për më tepër, Benzema tani ka shënuar të paktën një gol në nëntë paraqitje të njëpasnjëshme në La Liga, duke shënuar 11 gola në këtë proces.
Golat e tij kanë kontribuar në një serie prej 12 ndeshjeve pa humbje për Real Madrid në La Liga, pasi ata tani qëndrojnë në krye të tabelës.
Ka pasur edhe gola të rëndësishëm, si ai me thembër kundër Barcelonës në El Clasico dhe barazimi i vonshëm kundër Atletico Madridit në derbi.
Dy golat e shënuar së fundmi ndaj Cadizit e kanë futur Benzeman fuqishëm në garë edhe për ‘Pichichi’ këtë sezon në La Liga, pasi me 21 gola tani gjendet vetëm dy larg Lionel Messit, i cili ka 23 gola deri tani.
