Britania ka sanksionuar shtatë individë dhe një organizatë e lidhur me Iranin. Paketa e re e sanksioneve synon zyrtarët iranianë përgjegjës për kërcënimet në lidhje me sulmet apo grupet kriminale në Mbretërinë e Bashkuar.
Këta zyrtarë janë anëtarë të Njësisë 840 të Korpusit të Gardës Revolucionare Islamike (IRGC), e cila komplotoi për të vrarë dy prezantues televizivë nga kanali i lajmeve Iran International në Mbretërinë e Bashkuar.
Të paktën 15 kërcënime të tilla kanë ndodhur që nga janari 2022, sipas zyrës së jashtme. Të sanksionuarit nuk do të mund të udhëtojnë në Mbretërinë e Bashkuar dhe do t’u ngrihen asetet.
“Regjimi iranian dhe bandat kriminale që veprojnë në emër të tij përbëjnë një kërcënim të papranueshëm për sigurinë e Mbretërisë së Bashkuar”, tha Lord David Cameron, sekretari i jashtëm britanik.
“Paketa e sotme ekspozon rolet e zyrtarëve iranianë dhe bandave të përfshira në aktivitete që synojnë të minojnë dhe prishin liritë demokratike që ne vlerësojmë në vend.”
