Ish-kreu i agjencisë shtetërore ruse të hapësirës Roskosmos, Dmitry Olegovich Rogozin është plagosur ditën e djeshme pasi bombardimet goditën një hotel në një zonë të kontrolluar nga Rusia në Ukrainën lindore. Agjencitë ruse të lajmeve TASS dhe RIA Novosti shkruajnë se Rogozin është shtruar në spital dhe jeta e tij nuk është në rrezik, duke iu referuar deklaratës së ndihmësit të tij. Rogozin konfirmoi lëndimin për RT. “Jam plagosur në shpinë. Unë do të mbijetoj. Fragmenti ka kaluar një centimetër nga shtylla kurrizore”, tha ai. Rogozin është i njohur gjerësisht për retorikën e tij anti-perëndimore dhe mbështetjen e tij për pushtimin rus të Ukrainës. Por çfarë pritet të sjellë ky sulm?
Lufta bërthamore
Ajo që është më e frikshme është deklarata e tij para disa muajsh për një luftë bërthamore që do të zhdukte NATO. Ai pretendon se Rusia do të shkatërronte vendet e NATO-s në një luftë bërthamore brenda gjysmë ore. Në kanalin e tij Telegram, ai i bëri thirrje Rusisë që të mos lejojë që kjo të ndodhë. “Në luftën bërthamore, ne do të shkatërrojmë vendet e NATO-s për gjysmë ore. Por ne nuk duhet ta lejojmë këtë, sepse pasojat e shkëmbimit të goditjeve bërthamore do të ndikojnë në gjendjen e Tokës sonë”, ka shkruar ai. “NATO po bën luftë kundër nesh. Ajo nuk e publikoi, por kjo nuk ndryshon asgjë. Tani është e qartë për të gjithë. Batalionet kombëtare të Ukrainës dhe Forcat e Armatosura të Ukrainës janë operatorë të trajnuar nga instruktorët e NATO-s që shtypin levat dhe butonat e armëve të NATO-s”, shtoi Rogozin. Sipas tij, mposhtja e “një armiku më të fuqishëm ekonomikisht dhe ushtarakisht me armë konvencionale është e mundur vetëm me solidaritet të plotë të të gjithë vendit me ushtrinë, si dhe me mobilizimin e ekonomisë shtetërore dhe transferimin e kompleksit ushtarak-industrial të Rusisë dhe sektorëve industrialë të lidhur me bazat ushtarake”. “Dhe kjo duhet bërë menjëherë dhe shpejt”, përfundon ai pak muaj më parë
Kush është Dmitry Olegovich Rogozin, prapaskenat e sulmit
Ai u zëvendësua si shefi i agjencisë hapësinore Roscosmos në verë, pas sugjerimeve se Kremlini do t’i jepte atij një rol kyç në zonat e pushtuara nga Rusia në Ukrainën lindore. Në vend të kësaj, ai duket se drejton një njësi vullnetare të quajtur Ujqërit e Carit që ofron mbështetje për forcat proxy të Rusisë në lindje. Ai mbushi 59 vjeç të mërkurën, por mohoi raportet se po festonte ditëlindjen e tij në hotelin lokal Shesh-Besh, duke shtuar se dikush kishte zbuluar detaje se ku ishte përpara sulmit. “Ishte një takim biznesi me një rreth të ngushtë bashkëpunëtorësh pas kthimit nga një nga njësitë vullnetare. Ne kemi qëndruar në këtë hotel gjatë gjithë këtyre muajve dhe në tetë vjet armiku nuk e granatoi kurrë këtë vend,” postoi ai në rrjetet sociale të enjten. Një ndihmës i tha mediave ruse se hoteli ishte shënjestruar nga municione të drejtuara me precizion, ndoshta të gjuajtur nga një obus i prodhimit francez. Donetsk është kontrolluar nga autoritetet ruse që nga viti 2014, të cilët kanë akuzuar vazhdimisht forcat ukrainase për shënjestrimin e qytetit. Edhe pse forcat ruse kanë kapur zona të rajonit të Donetskut më në jug që nga fillimi i pushtimit në shkurt, ato kanë luftuar për të larguar ushtrinë ukrainase nga periferitë e vetë qytetit.
Putin nuk tërhiqet
Edhe pse Ukraina po përparon me sulmet, Putin deklaroi se ushtria ruse do të shtojë personelin e tij të përhershëm, pra përtej të mobilizuarve me detyrim në front, deri në 1.5 milionë ushtarë, duke tejkaluar kështu forcat amerikane. Vullnetarëve, presidenti i premtoi 195 mijë rubla secilit, rreth 2800 dollarë pesë herë mesatarja e pagës në vend. Ministri i mbrojtjes Shoigu, që përtej kritikave të shumta mbetet ende në post duke treguar se miqësia e tij me liderin e Kremlinit eshte e padiskutueshme, deklaroi se do të ndryshojnë edhe parametrat e mobilizimit, nga 19 deri në 27 vjeç, në 21 me 30. Një tjetër detaj interesant ishte plani i Putin për krijimin e njësive të reja, në vende të cilësuar si delikate, por që në fakt janë kërcënime të hapura, si në rastin e njësive që do të krijohet në kufi me Finlandën, vend që nga neutral ka aplikuar për anëtarësimin në NATO.
