Dritan Abazoviq, kryeministër i Malit të Zi, po vazhdon punët qeveritare pavarësisht se mund të shkarkohet pas dy jave nëse kalon mocioni i mosbesimit ndaj Qeverisë.
Ai sot ka dalë në terren për të inspektuar vendin se ku do të ndërtohet rruga rajonale për në Deçan.
I pari i qeverisë malazeze ka pohuar se “vizituam vendin së bashku me ministrin (Zhvillimit Ekonomik dhe Turizmit) Goran Gjuroviq dhe miq nga Plava, vizituam Bogiçevicën në Prokletije, ku do të kalojë rruga rajonale për Deçan”.
“Potencial i jashtëzakonshëm natyror që na jep mundësi të mëdha për zhvillimin e turizmit dhe sporteve të skive”, ka shkruar ai në Twitter.
Kujtojmë se punimet për ndërtimin e rrugës që lidhë Deçanin me Plavën janë ndërprerë tash e sa kohë pas ankesës së Manastirit të Deçanit.
Ndryshe, disa parti opozitare dhe ato që e mbështetin qeverinë malazeze kanë dorëzuar në Kuvend kërkesën për mocion mosbesim gjersa seanca për shkarkimin e Abazoviqit do të mbahet më 19 gusht. /Telegrafi/
