Emiratet e Bashkuara Arabe (EBA) nënshkruan marrëveshje me një kompani izraelite të sigurisë të specializuar në prodhimin e dronëve për të përmirësuar shërbimet e saj të sigurisë dhe për të shkurtuar kohën e reagimit emergjent.
Një ueb faqe izraelite e mbrojtjes tha se policia e Dubait ka nënshkruar një marrëveshje me një kompani izraelite të aerobatikës për të përdorur sistemin e saj të dronëve për shërbimet e sigurisë për të siguruar evenimentin “World Expo 2020” që pritet të mbahet në Dubai në muajin tetor.
Sistemi i dronëve do të zëvendësojë personelin e sigurisë dhe do të jetë më i shpejtë në përgjigjen e tij ndaj çdo incidenti. Të mërkurën, sundimtari i Dubait, Sheikh Mohammed bin Rashid vizitoi selinë e policisë në Dubai dhe përuroi platformën e kutisë së dronëve.
Në llogarinë e tij në Twitter, ai e përshkroi platformën si një shërbim “për të dërguar dronë nëpër Dubai për të ulur kohën e reagimit ndaj raportimeve kriminale dhe të trafikut nga 4.4 minuta në 1 minutë“.
Bin Rashid shtoi se shërbimi “zyrtarisht do të lançohet gjatë Expo 2020 Dubai“. Të mërkurën, EBA hapi zyrtarisht ambasadën e saj në Izrael në një ceremoni që u ndoq nga presidenti izraelit, Isaac Herzog.
Në shtator të vitit 2020, EBA dhe Izraeli nënshkruan një marrëveshje të ndërmjetësuar nga SHBA-ja për të normalizuar marrëdhëniet mes tyre. Që nga ajo kohë, të dy vendet kanë nënshkruar dhjetëra marrëveshje dypalëshe në fusha të ndryshme, përfshirë investimet, shërbimet bankare, turizmin dhe sigurinë.
