Paqja, mirësia e humaniteti janë mesazhi i parë që muaji Ramazan përçon tek njerëzimi tha sot Reisul Ulema H. Hfz. Shaqir ef. Fetai në urimin e tij me rastin e fillimit të muajit të shenjtë për myslimanët. Vetëm atëherë kur e fusim vetën në pozitën e tjetrit kuptojmë rëndësinë e solidaritetit dhe bamirësisë theksoi ai duke folur për rëndësinë e Ramazanit. Nxënia e diturisë është mes tjerash vlerë që përçohet përmes këtij muaji tek njerëzimi.
“Në këtë aspekt, Ramazani me të drejtë mund të konsiderohet muaj i shkencës, arsimit, librit, lapsit, shkronjave dhe shkrimit. Kuptimi i drejtë dhe esencial i këtij karakteri të Ramazanit, sjell dobi jo vetëm për ne, por edhe për të gjithë njerëzimin, ngase të arriturat shkencore nuk janë monopol i popujve të caktuar, por janë vlera të përgjithshme nga të cilat përfitojnë të gjithë njerëzit”, tha Reisul Ulema H. Hfz. Shaqir ef. Fetai.
