Kompania saudite e naftës Aramco njoftoi se në vitin 2022 regjistroi një fitim rekord prej 161.1 miliardë dollarësh. Siç raporton BBC, faktorët kryesorë që kanë ndikuar në një fitim të tillë janë rritja e çmimeve të energjisë në botë, si dhe rritja e kërkesës, dhe fitimi i realizuar paraqet një rritje prej 46.5 për qind krahasuar me një vit më parë, transmeton BBC.
Aramco njoftoi gjithashtu një dividend prej 19.5 miliardë dollarësh për tremujorin e fundit të 2022, i cili do të paguhet në tremujorin e parë të këtij viti, dhe pjesa më e madhe e atij dividenti do t’i shkojë qeverisë së Arabisë Saudite, e cila zotëron gati 95 për qind të kompanisë.
“Duke pasur parasysh se ne presim që nafta dhe gazi të mbeten thelbësore për të ardhmen e parashikueshme, rreziqet nga investimi i pamjaftueshëm në industrinë tonë mbeten reale – duke përfshirë rritjen e çmimeve të energjisë”, tha presidenti dhe CEO i kompanisë Amin Nasser, duke shtuar se, për të përballuar këto sfida, kompania do të fokusohet jo vetëm në zgjerimin e prodhimit të naftës, gazit dhe kimikateve, por edhe në investime në teknologji të reja me karbon të ulët.
Aramco tha në një deklaratë se rezultatet e kompanisë ishin “të nxitura nga çmimet më të forta të naftës bruto, vëllimet më të larta të shitura dhe marzhet e përmirësuara për produktet e rafinuara”.
Exxon fitoi 55.7 miliardë dollarë
Prodhuesi amerikan Exxon raportoi të ardhura prej 55.7 miliardë dollarësh dhe British Shell raportoi të ardhura prej 39.9 miliardë dollarësh, sipas shërbimit publik britanik.
Nafta e papërpunuar Brent, e cila mbart çmimin bazë të naftës, aktualisht tregtohet me rreth 82 dollarë për fuçi, megjithëse çmimet arritën në 120 dollarë për fuçi në mars të vitit të kaluar, pas fillimit të luftës në Ukrainë.
Duke komentuar deklaratën e kompanisë dhe fitimin e publikuar, Sekretarja e Përgjithshme e Amnesty International, Agnes Callamard tha se “është tronditëse që ajo kompani të bëjë një fitim prej më shumë se 161 miliardë dollarë në një vit duke shitur lëndë djegëse fosile – shkaku më i madh i krizës klimatike”. .
Ajo shtoi se është “edhe më tronditëse” kur merret parasysh se fitimi është bërë gjatë krizës globale të kostos së jetesës dhe i mbështetur nga rritja e çmimeve të energjisë, të cilat janë rezultat i “luftës agresioni të Rusisë kundër Ukrainës”.
Arabia Saudite është prodhuesi më i madh në OPEC.
