Presidenti rus Vladimir Putin tha të shtunën se vendi i tij nuk do t’i përkulet kurrë përpjekjeve perëndimore për të përdorur Ukrainën si një mjet për të shkatërruar Rusinë.
Në një video-mesazh për Vitin e Ri të transmetuar në televizionin shtetëror rus, Putin tha se Rusia po lufton në Ukrainë për të mbrojtur “atdheun” e saj dhe për të siguruar “pavarësinë e vërtetë” për popullin e saj.
Në një mesazh nëntë minutësh – fjalimi më i gjatë i Vitit të Ri të sundimit të tij dy dekadash – Putin akuzoi Perëndimin se gënjeu Rusinë dhe se provokoi Moskën për të nisur atë që ai e quajti një “operacion ushtarak special” në Ukrainë.
“Për vite me radhë, elitat perëndimore na kanë siguruar në mënyrë hipokrite për qëllimet e tyre paqësore,” tha ai në një fjalim të regjistruar para personelit ushtarak rus në selinë e Qarkut Ushtarak Jugor të Rusisë.
“Në fakt, në çdo mënyrë të mundshme ata inkurajuan neo-nazistët që kryen terrorizëm të hapur kundër civilëve në Donbas”, tha Putin në një fjalim jashtëzakonisht luftarak të Vitit të Ri, zakonisht kushtuar urimeve të mira për vitin e ardhshëm.
Gjatë ditës, ministri rus i Mbrojtjes Sergei Shoigu premtoi se fitorja në Ukrainë ishte “e pashmangshme” pasi vlerësoi heroizmin e ushtarëve rusë që luftonin në vijën e frontit dhe të atyre që vdiqën gjatë luftës 10-mujore.
“Perëndimi gënjeu për paqen. Ai po përgatitej për agresion dhe tani po përdor në mënyrë cinike Ukrainën dhe popullin e saj për të dobësuar dhe përçarë Rusinë,” tha udhëheqësi rus në fjalimin e tij të Vitit të Ri.
“Ne kurrë nuk e kemi lejuar këtë dhe nuk do të lejojmë askënd që ta bëjë këtë me ne,” cituan agjencitë shtetërore ruse të lajmeve të thoshte Putin në video, e cila u transmetua në mesnatë në lindjen e largët të Rusisë.
Kievi dhe Perëndimi hedhin poshtë pretendimet e Moskës se konfliktin e filloi ata dhe thonë se Putini nisi një luftë të pabazë agresioni në një përpjekje për të kapur territor dhe për të rrëzuar presidentin ukrainas Volodymyr Zelensky, raporton Reuters.
