As presidenti i shtetit Gjorgje Ivanov e as kryeministri Emil Dimitriev deri më tani nuk e gjykuan gjuhën e urrejtjes që u dëgjua në protestat e anëtarëve, simpatizantëve dhe zyrtarëve të VMRO DPMNE-së para Komisionit Shtetëror të Zgjedhjeve. Fjalimi i urrejtjes ishte i drejtuar për ambasadorët, kundërshtarët dhe ndaj qytetarëve shqiptarë. Ish ambasadori evropian Fuere, tha se pikërisht Ivanov dhe Dimitriev duhet të bëjnë thirrje për qetësimin e situatës, përmbajtje në këto momente të tensionuara, por ata vetëm heshtin.
“Kjo është shqetësuese dhe duhet të dënohet. Presidenti duhet të reagoj menjëherë dhe dukuritë e këtilla t’i dënojë. Por, është e qartë se ai është në gjumë. Edhe kryeministri duhet të thotë diçka menjëherë. Të gjithë liderët politik duhet të jenë të zëshëm dhe t’i dënojnë sjelljet e tilla, por për fat të keq siç pamë ditët e kaluara përmes protestave të organizuara nga partia në pushtet para selisë së KSHZ-së, ata i nxitin njerëzit në dhunë, provokojnë dhunë. Kjo është tërësisht e papranueshme dhe këtu BE dhe partnerët e saj ndërkombëtarë nuk guxojnë të hamenden, por të flasim dhe të kërkojnë sjellja e këtillë të ndërpritet ndërsa institucionet e shtetit dhe presidenti të apelojnë për qetësimin e situatës dhe të reagojnë kundër sjelljes së tillë”, është shprehur Ervan Fuere, ish ambasador i BE-së në Maqedoni.
Ndërsa protestat mbaheshin para KSHZ-së ku brohoritej kundër “shqiptarëve të mallkuar”, njëkohësisht në hapësirat e Komisionit, Subhi Jakupi nga BDI dhe Bedredin Ibrahimi nga PDSH ishin në linjë të njëjtë me VMRO DPMNE-në duke i mbrojtur qëndrimet e tyre. Zyrtarët e VMRO-së shpallën ambasadorë si të padëshiruar, ndërsa lideri i partisë lexoi shpalljen partiake, me të cilën paralajmëroi betejë kundër atyre që mendojnë ndryshe. Alsat M kërkoi qëndrim nga kabineti i presidentit Ivanov dhe nga Prokuroria Publike nëse do të reagojnë ndaj gjuhës së urrejtjes. Deri në këto momente nga këto dy institucionet, nuk ka kurrfarë përgjigje.
