Ish i dërguari amerikan për dialogun midis Beogradit dhe Prishtinës, Richard Grenel, thotë se kryeministri i Kosovës, Albin Kurti, ka gabuar që nuk ka marrë pjesë në “Ballkanin e Hapur”, ndërsa thotë se është vizionar për kryeministrin shqiptar , Edi Rama, transmeton InfoShqip.
“Mendoj se Kurti duhet të jetë pjesë e dialogut më të gjerë ballkanik, dhe ai nuk e bën këtë. Ky është një gabim i madh. Unë mendoj se njerëzit në Kosovë meritojnë të kenë një punë, por pa marrë pjesë në këtë diskutim, ata nuk do të jenë në gjendje të jenë pjesë e normalizimit të marrëdhënieve ekonomike në Ballkan, apo bisedimeve” – theksoi Grenel.
Grenel shpjegoi gjithashtu pse u kthye në Ballkan pasi la pozicionin drejtues në administratën Trump.
Ai deklaroi se promovon investimet e huaja dhe bashkëpunimin ekonomik në rajon, si mënyra e vetme për të garantuar mirëqenien e të gjithë qytetarëve, por veçanërisht për të siguruar më shumë mundësi punësimi për brezin e ri.
“Vizioni i Presidentit Trump për dialogun mes Kosovës dhe Serbisë kishte të bënte me krijimin e vendeve të reja të punës, me ekonominë, dhe ideja ishte që rajoni i Ballkanit të përparonte. Ne folëm për politikën për dekada, por nuk pati shumë përparim pasi ne vetëm u ulëm në tryezë dhe folëm vetëm për politikën, kështu që ne donim ta vazhdonim atë duke folur për zhvillimin ekonomik, duke folur për punësimin e të rinjve. Këtu kemi parë kohët e fundit, marrëveshja për normalizimin e marrëdhënieve ekonomike e bërë e mundur nga administrata Trump ka qenë shumë frytdhënëse. Por ajo që duam të shohim është vazhdimi i atij investimi, prandaj jam këtu, nuk punoj më për qeverinë. Unë jam në sektorin privat dhe ne po kërkojmë mundësi për të krijuar një sektor privat për investimet e huaja në Ballkan” – tha Grenel.
I dërguari i ish -presidentit Donald Trump deklaroi se i pëlqen “shqiptarët dhe kuzhina shqiptare”. “Ajo eshte e bukur. Sapo kemi mbërritur dhe do të kënaqemi këtu deri në fund të javës” – tha Grenel.
Ai nuk donte të komentonte faktin se ish -Presidenti Sali Berisha u shpall kohët e fundit një person “non grata” në Shtetet e Bashkuara./InfoShqip.com
