Para fillimit të vitit shkollor në shkollat fillore të Strugës nuk ka kushte teknike për zhvillimin e mësimit “online”.
Nga kjo komunë theksojnë se askund nuk ka internet optik kurse interneti ekzistues nuk mund t’i plotësojë nevojat. Komuna njofton bojkotimin e orëve nga 1 tetori nëse Ministria e Arsimit nuk e pranon kërkesën e tyre dhe të shkollave, për zhvillimin e mësimit me prani fizike.
Komuna e Strugës sot përsëri do të kërkojë nga Ministria e Arsimit që t’u lejojë atyre mësim me prani fizike.
”Në disa shkolla në zonat rurale të Strugës, instalimi elektrik është me një fazë që nga koha kur janë ndërtuar para disa dekadave, për këtë shkak nuk mund të instalohet internet më i shpejtë. Komuna e Strugës thotë se do të kalojë të paktën një muaj për instalimin e internetit optik nëpër shkolla sepse për këtë, duhet të shpallet thirrje publike”, nënvizohet në qëndrimin e kësaj komune.
