Nesër në orën 14:30 pritet të fillojë Mbledhja e Kryesisë së re të BDI-së, ku ministrat nga radhët e kësaj partie do të japin llogari për punën e tyre në ekzekutiv.
Burime të TV21 tregojnë për pikat e axhendës së nesërme. Pritet që kryetari i partisë, Ali Ahmeti të propozojë këtë rend dite:
1.Informim i Kryetarit te BDI-së rreth situatës politike ne vend;
2.Konstituimi i Sekretariateve te partisë;
3.Raporti i punës se ministrave, zëvendësministrave dhe sekretarëve shtetërorë;
4.Tjetër.
Pasi Ahmeti të informojë rreth situatës politike në vend, pritet emërimi i sekretarëve të partisë dhe udhëheqësit e sekretariateve, siç janë ato për ekonomi, drejtësi, bujqësi e të tjera. Pastaj zëvendëskryeministri i parë, Artan Grubi, pritet të prezantojë para bashkëpartiakëve punën e ministrave integristë. Pas kësaj do të hapet debati.
Duke pasur parasysh zhvillimet e fundit në BDI, ka shumë gjasa që me vërejtje të dalë i ashtuquajturi “grupi i zjarrit” për punën e ministrave, por ende nuk dihet nëse do të vendosin si kusht që të bëhen ndryshime në ekipin e ministrave nga radhët e BDI-së.
Duket se Ahmeti nuk do të bëjë ndryshime në kabinetin qeveritar, por eventualisht mund të propozohet periudhë tranzicioni që në periudhën e ardhshme të vazhdojë ekipi i njëjtë i ministrave, deri sa të harmonizohen qëndrimet brenda kryesisë së partisë.
Gjithashtu, mësojmë se Artan Grubi do te propozohet për shef kabineti të Ali Ahmetit.
Nga ana tjeter, burime nga “grupi i zjarrit” thonë se do të insistojnë për shkarkimin e zëvendëskryeministrit të parë Artan Grubit.
Se çfarë do të ndodh, pritet të shihet nesër.
