Franca do ta njohë zyrtarisht shtetin e Palestinës në shtator, gjatë seancës së Asamblesë së Përgjithshme të Kombeve të Bashkuara, deklaroi sot presidenti francez Emmanuel Macron.
Përmes një postimi në profilin e tij në platformën X, Macron publikoi një letër që ia kishte dërguar presidentit të Autoritetit Palestinez, Mahmoud Abbas, ku konfirmon synimin e Francës për t’u bërë fuqia e parë perëndimore që njeh zyrtarisht shtetin e Palestinës.
“Besnik ndaj angazhimit tim historik për një paqe të drejtë dhe të qëndrueshme në Lindjen e Mesme, kam vendosur që Franca ta njohë shtetin e Palestinës. Këtë do ta shpall zyrtarisht në Asamblenë e Përgjithshme të Kombeve të Bashkuara në shtatorin e ardhshëm. Nevoja për të ndalur luftën në Gaza dhe për të ofruar ndihmë për popullsinë civile është më urgjente se kurrë”, u shpreh Macron.
